Entra en vigor a lei de multirreincidencia, que pena con cárcere o roubo de móbiles

A lei contra a multirreincidencia entra en vigor este venres tras a súa publicación no BOE. É unha norma que penaliza con ata tres anos de cárcere os roubos de teléfonos móbiles e endurece as penas para quen reincida en delitos de furto leve ou estafa.

Impulsada por Junts, a lei recibiu a finais de marzo un amplo apoio do Congreso dos Deputados (272 votos a favor de PP, PSOE, Vox, PNV e UPN), tras pasar un periplo parlamentario que levou ao seu bloqueo durante meses: reactivouse en novembro do ano pasado, despois de que o partido de Carles Puigdemont anunciase a súa ruptura co Goberno.

A norma modifica o Código Penal e a Lei de Axuizamento Criminal para penalizar con ata tres anos de cárcere o roubo de móbiles e con penas de entre un e seis anos de cárcere a quen cometa unha estafa de contía menor a 400 euros e sexa multirreincidente, isto é, quen acumule polo menos tres condenas polo devandito delito.

Ademais, a lei dá potestade aos xulgados para que adopten con maior eficacia medidas cautelares de carácter privado, como sería o caso de prohibir acudir a determinados lugares ou residir neles.

Esta lei tamén lexitima ás entidades locais para exerceren a acción penal nos casos de furto.

Entre as novidades, tamén figuran a tipificación como delito do chamado petaqueo, é dicir, o uso de embarcacións que en alto mar fornecen de bidóns de combustible as narcolanchas.

Tamén en materia de narcotráfico, a lei incorporou un subtipo agravado de defraudación de fluído eléctrico, con penas de prisión de 6 a 18 meses ou multas de 12 a 24 meses para os delitos vinculados cos cultivos de marihuana en interiores, onde é habitual que se cometa fraude de subministración eléctrica.

Doutra banda, a lei habilita os xuíces que investiguen delitos cometidos a través de Internet para retirar preventivamente contidos ilícitos e interromper e bloquear os servizos que os ofrezan, mesmo no estranxeiro.