Persoal de Inditex sae á rúa para esixir subas salariais e condicións laborais "dignas"

Centos de persoas, empregadas de Inditex, protestaban este sábado, en pleno inicio das rebaixas, ás portas de varias tendas do grupo en distintas cidades españolas. Esixen unha suba salarial e melloras nas condicións laborais. 

A xornada de paro foi convocada polo sindicato CGT (Confederación Xeral do Traballo), para quen os traballadores de Inditex decidiron "dar un paso á fronte ante a precariedade".

"Coa situación económica que hai, os beneficios de Inditex repártense só entre a xunta de accionistas e os directivos. As traballadoras reivindican unha suba salarial como xa conseguiron as compañeiras na Coruña, que se dean conta de que as traballadoras e os traballadores somos o motor principal nas tendas e que necesitamos as subas salariais e as axudas sociais que ten a xente tanto no norte coma nos postos de dirección", di  Aníbal Maestro, secretario da sección estatal de CGT en Zara.

As concentracións prodúcense tras o acordo alcanzado en Galicia a finais de decembro para a suba dos salarios do persoal das tendas, tras varias xornadas de protestas.

Pola súa banda, CCOO e UGT anunciaron esta semana que comezarán a negociar con Inditex, a finais de xaneiro na mesa estatal, medidas globais en materia salarial que compensen o impacto da inflación en todas as empresas do grupo e en todos os territorios.