Preto de 700 mortos e decenas de desaparecidos polo monzón en Paquistán
A provincia noroccidental de Khyber Pakhtunkhwa é, con diferenza, a máis castigada, con 417 dos falecidos totais.
Reuters
O balance de mortos pola choiva do monzón en Paquistán ascendeu a 695 desde o inicio da tempada, segundo os últimos datos oficiais, mentres os equipos de rescate seguen buscando este martes a máis dun centenar de desaparecidos tras as catastróficas inundacións da fin de semana no noroeste do país.
O último informe da Autoridade Nacional de Xestión de Desastres (NDMA, polas súas siglas en inglés) actualizou este martes a cifra total de falecidos a 695, e a de feridos a 935, desde o 26 de xuño pasado, co principio da tempada de choiva.
A provincia noroccidental de Khyber Pakhtunkhwa é, con diferenza, a máis castigada, con 417 dos falecidos totais. Só nas últimas horas, polo menos 20 persoas máis perderon a vida nesta rexión.
"En Swabi, 17 persoas faleceron en incidentes relacionados coa choiva a última hora do luns, o que eleva o número total de mortos durante as últimas 24 horas a 20", dixo este martes Sara Malik, portavoz da NDMA.
Estas vítimas súmanse á catástrofe da semana pasada, cando máis de 350 persoas morreron na mesma provincia en apenas 48 horas.
Segundo a análise da NDMA, a principal causa de morte nesta tempada de monzón foron as inundacións repentinas, responsables de máis da metade dos falecidos.
Nas rexións montañosas do noroeste a chuvia torrencial converten os arroios en violentos torrentes de lodo e rocas que arrasan aldeas enteiras. A segunda causa máis importante é o colapso de inmobles, que representa un 32,3 % das mortes, xa que as incesantes precipitacións debilitan as estruturas das vivendas.
O presidente da NDMA, o tenente xeral Inam Haider, advertiu onte nunha rolda de prensa que a situación seguirá sendo "precaria" ata finais de agosto. "O país segue en risco de nova choiva torrencial, con dúas ou tres episodios adicionais probables nas próximas semanas", afirmou.
O primeiro ministro, Shehbaz Sharif, comprometeuse a apoiar ás zonas afectadas e anunciou que os membros do seu gabinete, doarán o salario dun mes para financiar os labores de socorro.
Paquistán é un dos países máis vulnerables do mundo aos fenómenos meteorolóxicos extremos. Esta nova catástrofe trae á memoria as inundacións sen precedentes de 2022, cando un "monzón con esteroides" mergullou un terzo do país, matou máis de 1.700 persoas e causou perdas económicas superiores aos 30.000 millóns de dólares.
