Dúas persoas feridas leves nun accidente múltiple con sete vehículos implicados en Vigo
Ambas foron atendidas no propio lugar polo persoal sanitario, sen que fose necesario o seu traslado a un centro hospitalario
O sinistro provocou retencións na circulación, como se aprecia na imaxe da cámara da DXT
Dúas persoas quedaron feridas levemente nun accidente múltiple rexistrado a primeira hora deste mércores en Vigo, no que se viron implicados un total de sete vehículos. Ambas foron atendidas no propio lugar polo persoal sanitario, sen que fose necesario o seu traslado a un centro hospitalario.
O accidente provocou retencións de tráfico na zona.
O sinistro produciuse ao redor das 08:00 horas, cando o sistema de emerxencias E-Call dun dos turismos implicados alertou ao 112 Galicia e situaba o accidente na VG-20, á altura do quilómetro 10, en Beade.
A partir de aí, desde o Centro Integrado de Atención ás Emerxencias 112 Galicia pasouse aviso ao Servizo de Urxencias Sanitarias de Galicia-061, aos Bombeiros de Vigo, á Garda Civil de Tráfico, á Policía Local e aos efectivos de Protección Civil.
Segundo confirmaron os equipos desprazados, sete vehículos víronse involucrados no accidente. Ademais das dúas persoas feridas leves, outras cinco saíron ilesas.
