Dúas persoas detidas en Marín pola venda de droga en pleno centro da localidade

A Policía Nacional detivo dúas persoas ás que responsabiliza dun punto de venda de drogas situado en pleno centro da localidade de Marín.

A súa actividade, segundo informou a comisaría provincial, provocaba entre os veciños unha situación de inseguridade. No lugar onde vendían a droga había gran afluencia de persoas toxicómanas.

Denuncias na Policía Nacional e na Local 

A investigación policial, sinala un comunicado, iniciouse a principios deste ano tras recibir as primeiras denuncias, tanto a Policía Nacional como a Policía Local de Marín.

Ambos os corpos policiais estableceron de forma coordinada unha serie de dispositivos de vixilancia e constataron a trasfega de drogodependentes na zona.  Os axentes interviñeron substancias estupefacientes aos compradores que acudían ao lugar para abastecerse das súas doses.

Tras demostrarse a actividade dos dous responsables deste punto de venda de droga, os investigadores procederon á súa detención.

As dilixencias foron remitidas ao xulgado de instrución de garda de Marín.