Dous párrocos ourensáns falan dos seus recentes encontros co papa Francisco en Roma
O papa Francisco non puido cumprir co seu desexo de visitar Santiago de Compostela, pero si que tivo relación con algúns sacerdotes galegos
É o caso do ourensán Luís Manuel Cuña, nomeado polo propio pontífice prelado da Orde de Malta, e Yerai Fariñas, párroco en Ourense, que estivo con el en novembro
Os dous destacan que era un home moi familiar, accesible e cun carácter aberto e dialogante
Luís Manuel Cuña Ramos era delegado de Patrimonio e arquiveiro da catedral de Ourense cando en decembro de 2023 lle comunicaron que o papa decidira nomealo novo prelado da Orde de Malta. Do seu primeiro encontro destaca a súa accesibilidade.
"O que tiña este papa é que era moi familiar, non che daba a impresión de estares falando co papa; facíate estar cómodo", di Luís Manuel Cuña Ramos, prelado da Orde de Malta en Roma.
A última vez que o viu foi en xuño do ano pasado, e faloulle de Ourense.
"Cando chegou a min preguntoume, ti de que diocese es? E díxenlle, eu son de Ourense, e díxome 'tres cousas hai en Ourense que non hai no mundo enteiro'. E díxome todo. Eu quedei cos ollos abertos e estiven por dicirlle, 'e como o sabe', pero calei", conta Luís Manuel Cuña Ramos.
Yerai Fariñas, párroco de Santa Eufemia do Centro, en Ourense, estivo co papa non hai moito, en novembro, e levoulle un agasallo especial, unha camiseta do Deportivo da Coruña co seu nome.
"Aí botou unha risa que facía tempo que non lle vía! Empezou a ver a camiseta, observala... ía serigrafada co seu nome".
"Unha persoa accesible, que atendía a todos sen excepción, e deunos un exemplo do que debe ser a Igrexa, un lugar de escoita, de unidade, unha familia... un lugar onde sentirse a gusto", asegura o párroco ourensán.
.png)
