Dous biólogos lideran en Sada un proxecto de agricultura rexenerativa

Experimentan con cultivos de especies foráneas e exóticas procedentes de ecosistemas similares ao noso e investigan como se adaptan.

"Este é un lulo, é unha planta de Colombia e Perú que dá uns froitos que se están a desenvolver cos que se fan xeados e zumes", explica Óskar Martínez, cofundador do proxecto Leiriñas de Uz. 

Óskar e a súa muller Carmen comezaron co seu proxecto, Leiriñas de Uz, hai cinco anos. Nel traballan baixo técnicas de agricultura rexenerativa.

"Porque é fundamental que o solo estea san para as nosas plantas. Hai un artigo científico que se chama 'Solo san, para plantas sas, para humanos sans'. Para nós isto é fundamental, é a nosa filosofía", argumenta Carmen Gayoso, cofundadora de Leiriñas de Uz. 

Empregan biocidas e fertilizante propios. Nada de química. E a biodiversidade axuda a controlar as pragas. A explotación é autosuficiente. "Dotándonos da auga do pozo e da enerxía a través dos paneis solares", di Óskar.

En 4.800 m2 de terreo sementan plantas, árbores, flores e aromáticas procedentes de Asia ou América. Todas comestibles. E seguen a innovar.

"Estamos intentando iniciar un cultivo de cacahuetes para levalo despois a grande escala porque polo de agora é pouco terreo", engade Carmen. 

Enmarcado na Reserva da Biosfera Mariñas Coruñesas e Terras do Mandeo, o proxecto conta na actualidade con 500 especies en estudo.