Detidos dous menores pola filtración de datos sensibles de Sánchez e varios ministros

A Policía Nacional detivo dous menores de idade pola filtración de datos sensibles do presidente do Goberno, Pedro Sánchez, e de ministros como Margarita Robles ou José Manuel Albares, así como de membros do Centro Nacional de Intelixencia (CNI).

A Audiencia Nacional abriu o pasado 22 de setembro unha investigación baixo segredo por esta filtración, reivindicada por un hacker co alias “N4TOX.

Segundo fontes policiais, as detencións practicáronse o 26 de setembro en Cataluña e Albacete, apenas catro días despois de iniciarse as dilixencias xudiciais. Desde entón, os axentes analizan abundante material informático incautado durante o operativo.

Os especialistas da policía trataban de localizar o autor ou autores que se agochaban tras ese alias, responsable de difundir en Telegram datos persoais de altas autoridades do Estado e de reivindicar a súa acción a través da mesma rede social.

Outra operación en xullo con dous mozos detidos

En xullo, a Policía Nacional xa detivera dous mozos menores de 20 anos pola difusión de información persoal de Pedro Sánchez, varios ministros e representantes políticos, así como de profesionais dos medios de comunicación.

Aqueles arrestos practicáronse en Las Palmas no marco dunha investigación secreta dirixida polo Xulgado Central de Instrución número 1 da Audiencia Nacional.

No caso do presidente Sánchez difundíronse o seu DNI, data de nacemento e dirección particular, aínda que non o número de teléfono móbil —como si ocorreu con outras figuras públicas—. Tamén se fixeron públicos datos de ministros como María Jesús Montero, Félix Bolaños e Fernando Grande-Marlaska, así como da presidenta do Congreso, Francina Armengol, e do presidente do Senado, Pedro Rollán.

Nesa operación, os expertos da Comisaría Xeral de Información e do CNI analizaron a filtración dun documento de 500 páxinas e a súa posterior difusión por canles de Telegram e na dark web.