Detido un veciño de Portas con numerosos antecedentes como autor de tres roubos de maquinaria e material

A Garda Civil detivo un veciño de Portas, de 30 anos de idade, con numerosos antecedentes, como presunto autor de tres delitos de roubo con forza cometidos na zona, de onde se levou diversa maquinaria e material técnico.

Segundo informaron fontes da Comandancia de Pontevedra, a investigación, levada a cabo por efectivos do posto de Caldas de Reis, comezou a principios do ano pasado e puxo no foco a este veciño de Portas, con antecedentes por delitos contra o patrimonio, delitos contra a seguridade viaria e delitos contra as persoas.

No mes de xullo, con autorización xudicial, a Garda Civil levou a cabo unha entrada e rexistro no domicilio do sospeitoso, con apoio de axentes da USECIC da Garda Civil de Pontevedra. Alí detiveron o home que, ademais, tiña en vigor varias requisitorias xudiciais; entre elas, unha de entrada inmediata en prisión.

Durante o rexistro do domicilio os gardas localizaron diversos obxectos de orixe sospeitosa, que o detido non puido xustificar, entre os que había unha máquina de soldadura profesional, unha hidrolimpadora, e material técnico de alta tensión, valorando os efectos nuns 5.000 euros.

A investigación posterior permitiu determinar que o material de alta tensión procedía dunha empresa vinculada a unha subestación eléctrica, de onde fora subtraído recentemente. O resto dos efectos intervidos correspondían a outros dous roubos con forza denunciados na zona.

Tras realizar as comprobacións pertinentes, a Garda Civil puido devolver todo o roubado aos seus lexítimos propietarios. Ao home detido, ademais das causas pendentes, atribúenselle agora outros tres roubos con forza.

As dilixencias practicadas foron entregadas nos xulgados de Caldas de Reis e de Cambados.