Detido un matrimonio tras acharse o pai dela morto na casa desde había tempo
Non se descarta que tivesen o cadáver do pai da muller na casa para cobrar a pensión deste home, pero tampouco que sufran unha posible "síndrome de Dióxenes"
Imaxe de arquivo
A Policía detivo un matrimonio en Torrelavega, Cantabria, que tiña o cadáver do pai dela na súa casa desde había, aparentemente, bastante tempo. Barállase en relación a esta situación o móbil económico de cobrar a pensión do falecido, aínda que tamén se apunta a unha posible enfermidade mental.
O concelleiro de Seguridade Cidadá de Torrelavega, Pedro Pérez Noriega, confirmou que a actuación da Policía Local produciuse na tarde de onte, venres, despois de que unha traballadora do centro de saúde Dobra alertara de que o home levaba tempo sen acudir ás súas revisións.
Os axentes locais acudiron á vivenda da filla, onde atoparon nun cuarto o cadáver do home, de 88 anos, que aparentemente non presentaba signos de violencia, segundo indicou o edil.
Pérez Noriega explicou que cando os policías locais chegaron á vivenda "case non se podía abrir a porta" polas "condicións deplorables" nas que vivía o matrimonio, de idades entre 50 e 60 anos.
O concelleiro sinalou que non se descarta que tivesen o cadáver do pai da muller na casa para cobrar a pensión deste home, pero tampouco que sufran unha posible "síndrome de Dióxenes". "Non é tanto o móbil económico, como as condicións nas que viven", afondou.
O matrimonio foi posto en liberdade na mañá deste sábado coa obrigación de presentarse o luns no xulgado, que se encarga agora, xunto á Policía Nacional, de investigar o acontecido.
