Detido por encerrar e violar a súa parella durante 12 días en Valencia

Axentes da Garda Civil detiveron un home de 57 anos por encerrar e violar a súa parella no seu domicilio da localidade de Llíria (Valencia). Apresouna durante 12 días nos que a someteu a un control constante para impedir a súa fuxida.

O detido encerrouna baixo chave e sen acceso a Internet nin a dispositivos móbiles. Alí, agredíaa sexualmente e gravaba todo sen o seu consentimento.

A denominada operación Amarres comezou despois de que se puxera unha denuncia por parte dun home que dicía que a súa exparella lle manifestou por mensaxería que estaba retida en contra da súa vontade na casa da súa parella.

Mentres comparecía a exparella, a muller puido volver contactar con el dicíndolle que lograra escapar. Logo, ela mesma compareceu ante a Garda Civil de Llíria.

A muller explicou que a súa parella era moi agresiva, tiña armas de fogo ilegais no domicilio e dedicábase ao tráfico de drogas.

Axentes da Garda Civil cercaron o domicilio para evitar a fuxida do home mentres se solicitaba a autorización xudicial para entrar e rexistrar o domicilio.

No interior interviñéronse dous revólveres, unha pistola, unha escopeta calibre 12, munición, 47 gramos de cocaína e varios dispositivos informáticos que almacenaban datos que confirmaron o relato da muller.

As armas estaban modificadas e eran ilegais e nos dispositivos encontraron gravacións sexuais da vítima e doutras exparellas.

Logo do rexistro procedeuse á detención do autor, un home de 57 anos de nacionalidade española.

Atribúenselle delitos de detención ilegal e agresión sexual, ambos relacionados co delito de malos tratos no ámbito familiar, e os de tenza ilícita de armas e municións e tráfico de drogas.