Deteñen un veciño de Porto do Son acusado de acoitelar o seu irmán
A agresión produciuse durante unha discusión na casa que comparten en Xuño
O acoitelado foi trasladado ao hospital con feridas graves
Os feitos sucederon pouco antes das oito da tarde no interior dunha vivenda do lugar do Curro, en Xuño. Os seus habitantes, dous irmáns de 68 e 70 anos coñecidos na parroquia, mantiveron unha forte discusión, presuntamente baixo os efectos do alcol.
Nun momento dado, un deles espetou un coitelo no estómago do outro, que resultou ferido grave e tivo que ser trasladado en ambulancia ao Hospital do Barbanza.
Esta mañá os axentes da Policía Científica inspeccionaban a casa na busca do coitelo e outras probas que axuden a esclarecer o sucedido.
O presunto agresor permanece detido nas dependencias da Garda Civil de Noia. Non está previsto que hoxe pase á disposición xudicial.
