Deteñen un home en Lugo por atacar a parella da súa ex cun coitelo

Axentes da Policía Local de Lugo detiveron un individuo que supostamente tentou agredir a parella da súa ex cun coitelo cando estaba coa muller e coa filla menor dela.

Segundo a información facilitada este martes pola Policía Local de Lugo, unha chamada ao 092 advertiu dun suposto intento de agresión nun domicilio na Rúa Mar Cantábrico, o que fixo que varias patrullas da Policía de Barrio se presentasen nese inmoble.

Cando chegaron, na rúa esperaba un home, que fora quen fixera a chamada de auxilio. Explicoulle aos axentes que quería denunciar un individuo que aínda estaba no portal do edificio. Aseguraba que esa persoa tentara agredilo cando estaba coa súa parella -exparella do atacante- e a filla menor da muller.

No relato aos axentes explicou que se presentara no domicilio, e cando a muller lle abriu a porta foise a por el cun coitelo. Nese momento, explicou, tiña á menor en brazos e fuxiu cara á rúa, onde esperou a chegada dos axentes.

Cando os axentes se achegaron ao edificio viron que o suposto agresor estaba no portal e “esgrimía dous coitelos”. Un veciño facilitoulles o acceso e entón iniciaron “unha longa negociación”, porque se negaba a desprenderse deles.

“Non vou soltar os coitelos, ides ter que dispararme”, chegou a dicirlles. Con todo, finalmente aceptou entregalos, tranquilizouse e os axentes procederon á súa detención e traslado a dependencias policiais para a tramitación das correspondentes dilixencias.