Deteñen un home en Pontevedra por violencia machista tras tirarse por unha ventá fuxindo da policía
O home tiña ordes de busca e captura para ingresar en prisión e estaba quebrantando unha orde de afastamento da suposta vítima dos malos tratos
Sufriu lesións a causa da caída e foi trasladado ao hospital Montecelo
O barrio de San Antoniño en Pontevedra foi escenario dun gran dispositivo policial o luns á tarde. Os veciños alertaran dun posible caso de violencia de xénero nunha vivenda deste inmoble. Escoitaron unha forte discusión dunha parella e chamaron a policía. Cando chegaron os axentes, a muller intentou disuadilos e negou que fora agredida.
Os axentes detectaron que o home estaba no interior da vivenda e ao intentar acceder non puideron porque colocara mobles na porta para impedir que entraran. Ao verse acurralado saltou por unha ventá que dá a un patio traseiro para intentar fuxir e evitar ser detido. Calculou mal o salto, non alcanzou a pasarela e caeu ao chan.
Os berros ao mancarse alertaron os axentes e os veciños que ata ese intre non se decataran do que estaba pasando.
O home foi arrestado e tivo que ser trasladado ao hospital de Montecelo para ser atendido das lesións que sufriu na caída.
Tiña dúas ordes de busca e captura para ingresar en prisión por causas pendentes. Fontes policiais confirmaron ademais que estaba quebrantando unha orde de afastamento da muller e suposta vítima dos malos tratos.
