A Fiscalía pide case 22 anos de prisión para o acusado de prenderlle lume á súa exparella en Vigo
O escrito de acusación do fiscal acúsao de tentativa de asasinato con asañamento por mollar con gasolina e poñerlle lume á que fora a súa moza ás portas da súa casa en Lavadores en 2024
O fiscal afirma que o fixo "consciente de que, desta forma, causaría un terrible sufrimento, aumentando de forma deliberada e innecesaria os padecementos tanto físicos como psíquicos que tería e que tiñan o claro e único propósito de acabar coa vida dela"
A Fiscalía pide case 22 anos de cárcere para o home acusado de intentar queimar a súa exnoiva ás portas da súa casa en Valadares en 2024. Acusa a Borja Rial de tentativa de asasinato con asañamento.
O fiscal, segundo o escrito de acusación, pide esa pena ademais do pagamento dunha indemnización de 672.000 euros, pola gravidade dos feitos e polas lesións da muller, tanto físicas como morais, e 38 anos de afastamento da vítima.
O xuízo aínda non ten data, pero si está listo ese escrito de acusación de fiscalía que recolle estes termos e indica que o acusado actuou ademais con asañamento e aplícalle a agravante de xénero e parentesco.
Borja Rial está acusado de botarlle gasolina á súa exparella -coa que tivo unha relación de 5 anos- ás portas da súa casa en Valadares e prenderlle lume. A muller conseguiu botarse ao chan e apagar as lapas, e alertar uns familiares cos seus berros.
Segundo relata o escrito de acusación o 14 de setembro de 2024 atacouna entre as 8:00 e as 9:00 horas fronte ao seu domicilio familiar. Alí, abordouna por detrás mentres ela saía da casa, agarrouna polo pelo e propinoulle golpes co xeonllo na cara para reducila.
Tras asperxela con gasolina, gritoulle "adeus", pronunciou o seu nome e prendeulle lume cun chisqueiro "consciente de que, desta forma, causaría a quen fora a súa parella sentimental un terrible sufrimento, aumentando de forma deliberada e innecesaria os padecementos tanto físicos como psíquicos que tería e que tiñan o claro e único propósito de acabar coa vida dela".
Agrega o fiscal que mentres a vítima se queimaba e pedía auxilio, o acusado permaneceu impasible e ríndose. Ela permaneceu quieta no chan ata que o procesado deixou de prestarlle, por un instante, atención, momento en que ela aproveitou para levantarse e ir correndo en dirección ao portal de acceso de vehículos da súa vivenda e abrilo.
O acusado, ao darse de conta de que ela se levantara pola súa propia iniciativa, intentouna agarrar, co claro propósito de impedir que puidese solicitar calquera tipo de axuda, pero non logrou retela, xa que o corpo dela continuaba ardendo, ante o que decidiu saír correndo sen prestarlle tampouco ningunha axuda nese momento.
Ela logrou salvar a súa vida e foi auxiliada por familiares.
Foi evacuada a un hospital con queimaduras nun terzo do seu corpo. Chegou a estar en coma inducido durante un mes e permaneceu case dous meses no centro en estado grave. Precisou de múltiples intervencións cirúrxicas. Tardou 411 días en alcanzar a estabilidade das súas lesións, pero segue de baixa polas importantes secuelas físicas e psíquicas.
O acusado, un veciño de Gondomar de 41 anos, ten antecedentes policiais: estivo investigado no ano 2010 pola morte doutra moza da súa propia vila que era a súa parella naquela altura. A autopsia determinara que a moza se suicidara dun tiro na sen.
