Detido o condutor do camión que atropelou mortalmente un home en Pontevedra
A vítima, de 48 anos, baixara do seu coche a 300 metros da rotonda en que apareceu
O condutor do camión non se detivo no momento do accidente
A Garda Civil investígao por homicidio imprudente
A presenza dun home tirado no asfalto da rotonda do Vao fixo saltar as alarmas pouco antes das oito da mañá. Malia que o 112 desprazou asistencia sanitaria nada se puido facer por salvar a vida do peón, un veciño de Vigo de 48 anos que se dirixía a traballar nas obras do polígono.
Segundo fontes da investigación, o atropelo produciuse a uns 300 metros de onde apareceu o corpo. A vítima baixara do seu coche neste punto da estrada de Vilagarcía e alí foi alcanzada por un vehículo. A Garda Civil sospeita que foi un camión que non parou para socorrelo, porque non se decatou do golpe ou porque decidiu escapar.
Tras as primeiras pesquisas a Garda Civil identificou o condutor do camión, que foi detido e queda investigado por un delito de homicidio imprudente. Mentres seguiranse practicando dilixencias.
