Deteñen nos Países Baixos unha muller acusada de preparar o atentado contra Vidal-Quadras
Deteñen nos Países Baixos unha muller acusada de preparar o atentado contra Vidal-Quadras
Trátase da quinta detención no marco da investigación sobre o atentado
Arquivo de efectivos do SAMUR atendendo a Alejo Vidal-Quadras tras o tiroteo (EFE/Emergencias Madrid. Ayuntamiento Madrid)
A Policía neerlandesa detivo grazas á investigación da Policía española unha muller acusada de financiar e preparar o atentado contra Alejo Vidal-Quadras, exdirixente do Partido Popular e cofundador de Vox, ocorrido en Madrid o pasado 9 de novembro.
A muller, de nacionalidade holandesa, foi arrestada nos Países Baixos en virtude dunha orde europea de detención e entrega emitida polas autoridades españolas.
Trátase da quinta detención no marco da investigación sobre o atentado, que leva a cabo a Comisaría Xeral de Información e instrúe o Xulgado Central de Instrución 5 da Audiencia Nacional.
Ata o de agora, o último arrestado era Greg Oliver Figueira Marcano, un venezolano localizado na fronteira colombiana supostamente implicado na compra da motocicleta empregada no atentado.
Os tres primeiros arrestos producíronse o 21 de novembro en España: unha parella en Lanjarón (Granada) e un mozo en Fuengirola (Málaga).
O home detido na localidade granadina ingresou en prisión provisional, en tanto que a muller -de orixe británica- e o mozo -tamén relacionado coa motocicleta- quedaron en liberdade.
Mentres, séguese buscando ao presunto autor material, Mehrez Ayari, de 37 anos, un cidadán francés de orixe tunisiana con múltiples antecedentes en Francia, e sobre o que xa pesa unha orde de detención internacional emitida polo xulgado da Audiencia Nacional.
Vidal-Quadras, de 78 anos, recibiu un tiro na cara sobre as 13:30 horas o pasado 9 de novembro moi preto do seu domicilio, na rúa de Núñez de Balboa de Madrid.
