Netanyahu eloxia o pasaxeiro israelí do voo Dubai-Tel Aviv: "Evitou outro 11S"
Israel investiga o sucedido como un atentado xihadista
Os pasaxeiros neutralizaron o copiloto despois de que este apuñalase ao capitán de voo
Israel cualifica de intento de atentado xihadista o incidente nun voo con destino a Tel Aviv. O avión partira dos Emiratos Árabes Unidos e, cando estaba chegando a Israel, un dos copilotos acoitelou ao capitán de voo e fixo descender bruscamente o aparello. Foron os propios pasaxeiros os que conseguiron reducir o agresor.
Foron momentos de pánico os que se viviron a bordo do voo entre Dubai e Tel Aviv. Nel viaxaban 174 pasaxeiros, a maioría israelís. Foron eles os que, despois de que a aeronave comezase a descender bruscamente, se decataron de que un dos pilotos apuñalara ao outro, o capitán indio Smit Machchlar.
Yaniv Hayun foi un dos pasaxeiros heroes, que logrou frear as intencións do atacante. Conta que lograron sacar o piloto agresor, inmobilizalo cos cables duns auriculares e tomar o control do avión.
"Acabamos de neutralizar o terrorista. Necesitamos axuda", conta estoutro pasaxeiro que tamén colaborou.
Un terceiro piloto logrou aterrar de emerxencia en Arabia Saudita.
Netanyahu eloxia o heroico pasaxeiro e asegura que se evitou outro 11S
O Goberno israelí cre que a intención do piloto, natural de Omán e agora detido en Arabia Saudita, era estrelar o avión. Di Netanyahu que se evitou outro 11S e apunta a Irán. Cre que pretenden intensificar os ataques terroristas a menos dun mes para as eleccións en Israel.
De momento, descoñécense as motivacións do atacante.
Netanyahu ordenou reforzar a seguridade en todos os avións que voen a Israel e realizar exhaustivos controis de seguridade a todos os pilotos.
A aeroliña FlyDubai anunciou que paraliza a ruta entre Dubai e Tel Aviv mentres dure a investigación.
