Deteñen en Vilagarcía unha muller por agredir e ameazar a nai: "Vaime matar"

Detrás das persianas, sempre baixadas, agóchase un drama familiar. 

"É unha veciña que vive coa nai e que ten algún problema porque vén a ambulancia dúas ou tres veces ao mes".

"É un 'senvivir', día si e día non. Dúas ou tres veces á semana vén a policía ao edificio. Sempre están con 'jaleos".

"Jaleos" derivados da enfermidade mental da máis nova. Esta vez a nai colleu medo. Saíu ao balcón pedir auxilio, berrando que a filla a quería matar. A Policía Local atopou a moza pechada nun cuarto, moi alterada e coitelo en man.

"Foi por cartos. Pedíalle cartos á nai. A nai díxolle que non llos daba e empezaron".

"Non é a primeira vez que pasa algo parecido".

Detivérona por agresión e ameazas. As de sempre. Advirten que é un perigo para ela mesma e para a veciñanza.

"Xa tentou tirarse polo balcón varias veces, abriu unha bombona querendo facela explotar, a golpes e martelazos nas paredes que cos golpes agrietou unha ventá, ameaza á xente do edificio...", denuncia desesperada a veciña que máis o sofre.

Os berros, os golpes, as ameazas reviven pantasmas de hai dous anos, cando a poucos metros outro mozo matou a nai.

"Da outra vez quedamos todos en shock e pola mente destas persoas non sabes o que pode pasar. Podería ser un espello a imitar", advirte outra muller dun negocio próximo.

Piden respostas ante estas chamadas de atención, unha intervención a tempo que evite males maiores.