Desmantelan unha festa 'rave' en Mos con medio cento de participantes

A Garda Civil de Pontevedra, a través do Grupo de Información da súa comandancia, impediu a celebración dunha festa rave no merendeiro da Gándara, no municipio de Mos.

Os axentes despregaron un dispositivo no que participaron efectivos da USECIC, Subsector de Tráfico e patrullas da Compañía de Vigo.

Durante a operación, identificaron os organizadores do evento e limitaron o acceso á zona, impedindo a chegada de máis asistentes en vehículo.

No momento da intervención dez persoas estaban montando o escenario e outras 30 persoas estaban subindo a pé debido á restrición do acceso con vehículos.

Tras as xestións policiais, ás 08:18 desta mañá, os organizadores informaron a través de redes sociais que o evento quedaba suspendido  e os asistentes comezaron a abandonar o lugar de maneira ordenada.