Consumo recomenda reclamar ante as anomalías na recepción das facturas da luz

Centos de galegos están afectados polos atrasos na factura da luz, con anomalías na recepción dos recibos, atrasos ou acumulación de varios meses, segundo denuncian cidadáns consultados e corrobora a xerente do Insituto Galego de Consumo, Sol Vázquez. "Ou ben non están recibindo a factura ou lles chegaron ao seu domicilio tres, catro ou cinco facturas xuntas", explica.

O cambio no cálculo dos custos da factura foi a orixe dos problemas na emisión dos recibos. Rexistráronse fallos nos sistemas informáticos ou nos contadores que levaron a algunhas empresas a facer lecturas estimadas do consumo.

Desde o IGC aconsellan reclamar. "Poden solicitar o pago fraccionado, pero tamén que haxa unha compensación porque o consumidor ten dereito a recibir mes a mes a factura", sinala Sol Vázquez.

As indemnizacións poden chegar ata os 30 euros por cada mes de atraso.