Ata un cento de desaloxos en Cartaxena por mor da forte chuvia da dina Alice
A Aemet ten en aviso vermello o litoral de Murcia e o sur de Alacant
Un cámping do Mar Menor e as instalacións de Navantia son algúns dos lugares desaloxados
Prevese que Alice manteña en risco o litoral de Levante varios días máis
A dina Alice puxo este venres en aviso vermello áreas de Alacante e Murcia, con precipitacións de ata 120 litros por metro cadrado e máis de 100 desaloxos en Cartaxena aínda que sen graves incidencias.
Nalgúns puntos do litoral de Cartaxena rexistráronse 120 litros por metro cadrado e a dina mantén ata a medianoite o máximo nivel de alerta, aviso vermello, aínda que nesa comarca e en Mazarrón non se produciron incidencias graves entre as 189 notificadas no Centro de Coordinación.
Alice levou a esa rexión chuvias extremas de ata 60 litros nunha hora en Mazarrón e o Campo de Cartaxena, e o nivel laranxa está activado no Val do Segura e no do Guadalentín, así como nas localidades de Lorca e Águilas.
En Cartaxena a cifra de desprazados supera xa o centenar, pois 101 persoas recibiron asistencia municipal tras saír de forma preventiva do cámping Vilas Caravaning, da urbanización Baía Bella e do poboado de Algameca Chica.
Nas últimas horas rexistráronse chuvias acumuladas de máis de 100 litros en Cabo de Palos, onde a Axencia Estatal de Meteoroloxía computaba 134 ás 16 horas, A Manga do Mar Menor ou Praia Honda.
O estaleiro de Navantia en Cartaxena tamén resultou afectado, aínda que mantén os servizos mínimos imprescindibles. Doutra banda, suspendeuse a actividade lectiva e dos centros sociais en trece poboacións.
O delegado do Goberno de Murcia, Francisco Lucas, afirmou que "todos os recursos do Estado están perfectamente coordinados, mobilizados e actuando sobre o terreo" e que mentres dure a situación de emerxencia, os ríos, ramblas e leitos serán vixiados presencialmente e de forma permanente.
Os nubeiros que se avistaban no litoral sobre o mar desprazáronse de novo cara á terra
Na Comunidade Valenciana, o aviso vermello só afecta á provincia de Alacante. Nesa comunidade rexistráronse precipitacións que acumularon preto de 100 litros por metro cadrado en doce horas, con chuivas persistentes e de intensidade moi forte.
A Confederación Hidrográfica do Xúcar constatou que hai unha "situación de normalidade" nos encoros e, en canto a caudais, non se detectaron rexistros de superación de limiares pero existe perigo de crecidas e inundacións repentinas en leitos e ramblas, polo que pide "moita precaución".
Pola súa banda, en Baleares, o Comité Técnico Asesor do Plan Meteobal activou os avisos en toda a comunidade por choivas e tormentas e recomendou limitar as actividades deportivas e sociais ao aire libre en Mallorca, Eivissa e Formentera, con chuvascos de ata 60 litros por metro cadrado.
Mantívose a alerta laranxa en Eivissa e Formentera e activouse en Mallorca, mentres que o caso de Menorca púxose en marcha a amarela. A previsión contempla chuivas intensas esta noite e madrugada en Eivissa e Formentera.
