Desactivado o plan de emerxencia polo incendio dunha nave de fitosanitarios en Vilagarcía
Os últimos veciños desaloxados xa puideron regresar ás súas casas
O lume destruíu por completo a nave e provocou pequenas explosións durante horas
A Xunta desactivou o plan de emerxencia que puxera en marcha o pasado sábado polo incendio declarado nunha nave de produtos fitosanitarios en Vilagarcía de Arousa. A medida permite que os últimos veciños afectados, concretamente os dos números 4 e 6 da rúa da Bouza, poidan volver ás súas vivendas.
O incendio comezou arredor das 11:00 horas do sábado na nave situada na avenida de Pontevedra, preto dunha estación de servizo. Como prevención, desaloxáronse máis de 20 vivendas da contorna.
Aínda que non houbo vítimas, a estrutura da nave colapsou por completo. Nas horas seguintes, producíronse pequenas explosións debido ao material almacenado no interior.
