Denuncian o desleixo dunha casa do barrio ferrolán de Ultramar
Os veciños alertan da deterioración do inmoble
Desde o Concello advirten de que, se os propietarios non deixan inspeccionala, recorrerán á vía xudicial
"Xa non hai teito nin nada. Está chea de porcallada. Xa se ve. E cheira fatal", comenta unha veciña. É a situación coa que conviven os veciños deste barrio de Ultramar.
"É un desastre. E agora está aberta". "Leva abandonada 20 ou 30 anos".
E contan que ás veces mesmo serve de acubillo para ocupantes ilegais. "Hai de todo: veciños bos e veciños malos". "Aí métense a durmir".
Amais, temen que a falta de mantemento provoque desprendementos ou mesmo un incendio. "Como boten aí un misto...". "Pode desprenderse algo e caer á rúa". "É un perigo para todo".
Nas últimas horas, o Departamento de Urbanismo procedeu a citar os propietarios dos distintos andares deste inmoble da Estrada de Castela para que autoricen a entrar técnicos municipais para constatar o estado do edificio. E no caso de que non dean autorización, desde o Concello informan de que procederán por vía xudicial.
