Definidos os horarios da primeira eliminatoria da Copa do Rei
Os partidos xogaranse na fin de semana do 12-13 de novembro
A Federación Española de Fútbol deu a coñecer os horarios dos partidos da primeira eliminatoria do Copa do Rei na que haberá nove equipos galegos.
O primeiro en comezar será o Barbadás, que recibirá o Real Valladolid o sábado ás 16:00 horas, seguramente no campo do Couto. Unha hora máis tarde principiará o partido que o Deportivo ten que xogar no campo de céspede artificial do Guijuelo. Ás seis será a quenda dos dous equipos que xogan en Euskadi: o Rácing de Ferrol, en Sestao, e o Lugo, diante do Arenas de Getxo.
Para o domingo quedan os outros cinco. Ás 12:00 o Pontevedra no campo do Manresa. Pola tarde (16h) o Celta no campo de Cartagonova diante do Algar de Preferente. Ás cinco xogan os dous equipos de 2RFEF: o Coruxo recibe o Eldense e o Ourense C. F. ao Alcorcón. Pechará a xornada o Arenteiro xogando en Espiñedo diante do Almería ás 21:00 horas.
