Decenas de miles de persoas desafiaron a Orbán na prohibida Marcha do Orgullo de Budapest

Coa participación de decenas de miles de persoas, entre elas numerosos políticos e eurodeputados de toda Europa, celebrouse este sábado a Marcha do Orgullo 2025 de Budapest, prohibida polo Goberno ultranacionalista de Hungría.

Nun ambiente pacífico e festivo, os asistentes camiñaron polo centro da capital húngara baixo o lema "A liberdade e o amor non poden ser prohibidos". Non se rexistrou ningún incidente.

Ata o inicio da marcha na praza Deák, situada xunto ao Concello da capital maxiar, non houbo incidentes, só algúns actos de provocación por parte de opositores á concentración.

Poucos minutos despois do inicio, unha ducia de axentes da policía bloquearon o camiño da marcha, nun intento de desviar a ruta prevista.

"Arrepentídevos! Pódese evitar morrer de sida. Deixade a homosexualidade!", gritaba un home que levaba unha camiseta negra na que se lía "Predicador cristián" e que ía acompañado por outra persoa que portaba unha biblia no alto.

Unha recente enquisa realizada polo instituto demoscópico 'Publicus' indica que o 78 % da xente en Budapest está en contra da prohibición emitida pola policía húngara, que alega unha recente lei aprobada polo Goberno ultranacionalista.

Esta lei, impulsada polo Fidesz, o partido do primeiro ministro ultranacionalista Viktor Orbán, estipula que se poden prohibir eventos públicos se estes poñen en perigo o desenvolvemento considerado como "adecuado" dos menores de idade.

Varios membros do Goberno español, como a vicepresidenta segunda Yolanda Díaz ou o ministro de Cultura, Ernest Urtasun, acudiron a Budapest para apoiar ao colectivo LGTBI de Hungría.

Ante a prohibición emitida, o alcalde de Budapest, o ecoloxista progresista Gergely Karácsony, decidiu incluír a Marcha do Orgullo dentro dun evento municipal da capital, que na súa opinión non require permiso nin rexistro de parte das autoridades.

O propio Orbán advertiu nos últimos días que os participantes na marcha non autorizada poderían sufrir consecuencias legais, como multas de ata 200.000 forintos (uns 500 euros).