David Sánchez: "Eu non teño capacidade de influír en nada"

David Sánchez, irmán do presidente do Goberno, negou na Audiencia de Badaxoz que influíse na contratación do seu amigo Luis Carrero como xefe de Coordinación de Programas de Actividades Transfronteirizas da Deputación.

"Eu nin teño capacidade de dicir nada nin información administrativa sobre o estado dese procedemento", declarou na vista que se celebra na Audiencia de Badaxoz en relación á súa contratación e á do seu amigo Luis Carrero.

Foron dez minutos de declaración en que o irmán do presidente só contestou as preguntas formuladas polo seu letrado, Emilio Cortés.

David Sánchez explicou que a Oficina de Artes Escénicas en que el traballaba "non era entendida como unha oficina física", senón que era unha "categoría administrativa". Por iso, nos anos 2023 e 2024 estivo traballando en "espazos comúns" como xefe de servizo, ata que o recolocaron nos servizos centrais da Deputación.

Gallardo, cando se decatou de que se presentaba David Sánchez: "Que gañe o mellor!"

O expresidente da Deputación de Badaxoz Miguel Ángel Gallardo negou con rotundidade influír na creación do posto de traballo que ocupou David Sánchez e asegurou que cando se decatou de que este último era un dos aspirantes a súa expresión foi: "Que gañe o mellor!".

Gallardo, que non quixo contestar as acusacións populares, negou tamén participar na decisión de quen debía ocupar a praza de coordinador dos conservatorios, pois iso sería prevaricación.

Gallardo explicou que na reunión preparatoria dos orzamentos da Deputación de Badaxoz de 2017, celebrada en outubro de 2016, púxose sobre a mesa tanto a creación do devandito posto directivo como doutros postos, pero en ningún momento “absolutamente” pensou “en ningunha persoa”.