Pouca afluencia de votantes nas oficinas de Correos que abriron este domingo en Galicia
Pouca afluencia de votantes nas oficinas de Correos que abriron este domingo en Galicia
Estiveron operativas na Coruña, Santiago de Compostela, Ferrol, Lugo, Ourense, Vigo e Pontevedra, ademais de en Sanxenxo, en horario de 9:00 a 14:00 horas só para depositar o voto
Centos de oficinas recolleron o voto en toda España
Correos abriu as súas oficinas este domingo para facilitar o voto por correo en toda España e non descarta ampliar o prazo para depositar a papeleta, fixado ata o momento para o xoves 20 de xullo.
Do mesmo xeito que o sábado, este domingo abriron centos de oficinas de Correos para facilitar o depósito do voto por correo. No caso de Galicia estiveron operativas nas sete cidades grandes: A Coruña, Santiago de Compostela, Ferrol, Lugo, Ourense, Vigo e Pontevedra e a de Sanxenxo das 9:00 ás 14:00 horas. Poucos votantes acudiron a depositar o seu voto nesta xornada de apertura especial.
A estes reforzos súmanse tamén a apertura en horario de mañá das oficinas onde é festivo o luns 17, como Arzúa, Camariñas, Ponteceso, As Pontes ou Salceda de Caselas.
No resto de España, nas grandes capitais, como Madrid e Barcelona, ou en zonas turísticas de Valencia ou de Andalucía as oficinas de Correos abriron tamén de 09:00 a 14:00 horas.
Xa se chegou aos 2,6 millóns de solicitudes de voto por correo en toda España, en Galicia máis de 146.000, unhas cifras récord na democracia.
Para estas eleccións Correos realizou en Galicia algo máis de 1.400 contratacións de apoio de persoal.
Durante a semana as oficinas que atendían desde as 8:30 ata as 21:00 estenden horario ata as 22:00 horas.
