Os galegos aforrarán case 800 millóns polas rebaixas fiscais da Xunta

O conselleiro de Facenda, Miguel Corgos, avanzou que a Xunta deixará de ingresar 793 millóns de euros nos orzamentos de 2026 polo impacto de beneficios fiscais, o que supón un incremento do 5,59 % respecto a as contas de 2025.

Segundo os seus datos, o 88 % destes beneficios fiscais teñen un "carácter social", de modo que fixo fincapé, na súa comparecencia tras entregar o proxecto de lei no Parlamento, como o exercicio pasado, no aspecto "cualitativo" destas medidas.

De acordo cos números de Facenda, os beneficios fiscais subiron desde os 430 millóns de euros que representaban en 2019 ata os 793 millóns que supoñerán o próximo ano para as contas públicas.

En 2020 supuxeron 448 millóns menos de ingresos, en 2021 significaron unha diminución de 472 millóns, en 2022 foron 522 millóns os que implicaron os beneficios fiscais, en 2023 impactaron en 592 millóns nas contas e en 2024 en 686.

"A Xunta prefire deixar de ingresar -estas contías- para que revertan nas familias e os fogares", reiterou Corgos en conferencia de prensa, antes de recalcar o "compoñente social moi importante" desta actuación, que en 2026 sobe en 42 millóns en relación con 2025, e increméntase en 321 millóns "nos últimos cinco anos", un "reforzo substancial cada ano".

"Non só eliximos beneficios fiscais polo número de beneficiarios, moitas veces tamén polo seu incentivo, pola calidade, non pola cantidade, que se precisa para un determinado colectivo", insistiu.

Miguel Corgos fíxolle entrega ao presidente da cámara, Miguel Santalices, do proxecto de presupostos que elaborou o Goberno galego. 

Supera os 14.000 millóns de euros, cun gasto centrado nos servizos sociais, sanidade e educación. A Xunta mantén as baixadas de impostos aplicadas estes anos e aplica cinco novas.

Críticas da oposición

Nada máis entrar eses orzamentos na cámara para a súa tramitación, os grupos da oposición xa foron moi críticos co proxecto do Goberno galego.

Socialistas e nacionalistas din que resulta insuficiente e tiran dunha comparación: os presupostos aumentan un 2,1 por cento, mentres a inflación está cerca do 3 por cento. Para os populares, Galicia comeza a ser unha normalidade extraordinaria, xa que un Goberno pode presentar uns presupostos, aprobalos na cámara e que entren en vigor o próximo 1 de xaneiro.