'Cookies' en piloto automático: adeus aos 'banners', excepto nos medios

A Comisión Europea propuxo cambios este mércores relativos ao consentimento das cookies para que os navegadores de Internet xestionen de forma automatizada as preferencias que os usuarios definisen de antemán, sen que se teñan que configurar cada vez que se visite unha páxina web.

A lexislación actual da Unión Europea obriga as páxinas web e aplicacións móbiles a obter a autorización dos usuarios para poder introducir cookies nos teléfonos e computadores portátiles, a tecnoloxía que lles permite lucrarse cos servizos que ofrecen aos internautas, pero tamén rastrexar o seu comportamento para comercializar publicidade personalizada e así aumentar os seus ingresos.

Normalmente, este consentimento adoita solicitarse mediante banners emerxentes nunha páxina web ou aplicación móbil que "non sempre son fáciles de entender" e, polo tanto, non logran o seu obxectivo de informar os individuos sobre a protección da súa privacidade e os datos persoais, considera a Comisión.

A proposta forma parte dunha revisión máis ampla que hoxe expuxo o Executivo comunitario das leis que regulan o sector tecnolóxico -entre elas as relativas á xestión e protección dos datos persoais- co argumento de que contribúe a reducir a carga burocrática para as empresas.

Neste sentido, Bruxelas, asegurou que o deseño dos banners xera tamén "custos considerables" aos provedores de servizos dixitais.

Por iso, o Executivo comunitario propuxo que os usuarios poidan configurar as súas preferencias sobre o consentimento de cookies unha única vez, de tal forma que as páxinas webs estean obrigadas a respectar as súas preferencias.

Con todo, a Comisión quere eximir os medios de comunicación: "Dada a importancia dos ingresos publicitarios para o xornalismo independente como un piar indispensable dunha sociedade democrática, os provedores de servizos de medios de comunicación (...) non deberán estar obrigados a respectar" as preferencias sobre o consentimento de cookies dos usuarios.

"É esencial que a UE actue para conseguir a simplificación e a competitividade, mantendo ao mesmo tempo un alto nivel de protección dos dereitos fundamentais das persoas, e este é precisamente o equilibrio que consegue este paquete", asegurou o comisario europeo encargado da protección dos consumidores, Michael McGrath.

Para que a revisión das normas que hoxe expuxo a Comisión saia adiante, o Consello da UE e o Parlamento Europeo deben darlle aínda o seu visto e prace, e a esquerda xa anunciou o seu rexeitamento porque cre que os cambios no consentimento das cookies poden dar ás grandes tecnolóxicas un maior control sobre os datos dos usuarios.