O Goberno aproba o Bono Cultural para mozos que fan os 18 anos ao longo deste 2023

Os mozos que durante este ano fagan 18 anos contarán de novo con 400 euros para poder gastar en produtos culturais, tras aprobar este luns o Consello de Ministros o programa Bono Cultural Mozo 2023,

"A cultura ha de estar ao alcance de todos e esta axuda é un estímulo para que a mocidade se achegue a ela, consumir e xere novos hábitos de lecer", dixo a ministra voceira do Goberno, Isabel Rodríguez.

En concreto, e do mesmo xeito que en 2022, o Bono Cultural Mozo adquirirase como unha tarxeta de prepagamento que o beneficiario pode ter de forma virtual no seu móbil ou recibir de forma física no seu domicilio. A tarxeta é persoal e intransferible.

200 euros en artes ao vivo

Unha vez obtida, os mozos que ao longo deste ano cumpran 18 anos poderán gastar 200 euros en artes ao vivo, patrimonio cultural e artes audiovisuais. Os beneficiarios poderán mercar con eles entradas para museos, obras teatro, concertos ou cinema. 

Nesta partida tamén se inclúen os espectáculos taurinos, logo de que en febreiro o Tribunal Supremo estimase o recurso da Fundación Toro de Lidia contra o real decreto polo que se establecía a regulación do bono cultural e que excluía aos touros das actividades culturais ás que se podía acceder con esa axuda.

Produtos en soporte físico e dixitais

Outros 100 euros poderanse gastar en produtos culturais en soporte físico. Por exemplo, libros, revistas, prensa, ou outras publicacións periódicas; videoxogos, partituras, discos, CD, DVD ou Blu-ray.

E os outros 100 euros poderán ser destinados a consumo dixital ou en liña. Por exemplo, subscricións e alugueiros a plataformas musicais, de lectura ou audiolectura, ou audiovisuais, compra de audiolibros ou subscrición para descarga de arquivos multimedia (podcasts), para videoxogos en liña, revistas ou outras publicacións periódicas.

Non será subvencionable, explicaron desde Cultura, a adquisición de produtos de artesanía, obra plástica e gráfica, produtos de papelería, libros de texto curriculares -xa sexan impresos ou dixitais- cursos, talleres e seminarios, equipos, software, hardware e consumibles de informática e electrónica; así como material artístico, instrumentos musicais ou os espectáculos deportivos, a moda e a gastronomía.

Tampouco o será a adquisición de produtos que fosen cualificados como X ou pornográficos de conformidade co sistema de regulación de contidos aplicable a cada produto.

As actividades e gastos subvencionables deberán realizarse no prazo máximo dun ano desde a data de concesión do Bono Cultural Mozo a cada persoa beneficiaria, que o poderá usar só en establecementos ou institucións adheridas ao programa, que presten servizos en España.

A xestión do programa realizarase a través dunha plataforma tecnolóxica específica, na que se presentarán as solicitudes, que se tramitarán por orde de presentación. Unha vez concedida a axuda ao beneficiario, abonarase o importe total concedido, nun único pagamento, en formato de tarxetas prepagamento virtuais nominais, que estarán identificadas con números e a identidade do beneficiario.

Excepcionalmente, poderanse emitir tarxetas físicas, no caso de que o beneficiario non dispoña de dispositivo móbil compatible para conter a mencionada tarxeta virtual, cando así se solicite.

A futura norma tamén prevé que o Bono Cultural Mozo sexa compatible con calquera outra subvención, axuda, ingreso ou recurso procedente doutras administracións públicas.

Sen baremo por renda

Unha das cuestións que suscitou na conferencia de prensa posterior ao consello de Ministros era se este bono sería concedido atendendo a algún criterio relacionado coa renda familiar dos beneficiarios.

Tras a polémica xurdida polo feito de que persoas con elevados ingresos se beneficiasen polo bono eléctrico, a ministra portavoz dixo que non contemplaban establecer baremos para o bono cultural. 

"Poida que haxa quen non precisa e non o solicite", di Isabel Rodríguez, que o definiu "como o recibimento á maioría de idade, e a súa vinculación á cultura para a construción dunha sociedade máis crítica e comprometida".

"Nesta segunda edición do bono móstrase o compromiso co sector da cultura, que supón o 3,4 do PIB e dá emprego a máis de 700.000 persoas", matizou a ministra voceira.

Na actualidade hai adheridas 3.000 empresas e institucións, polo que Rodríguez fixo un chamamento para que sexan máis as que se sumen ao Bono Cultural Mozo.