Un estudo da USC cifra o valor mineiro de Galicia en ata 45.000 millóns de euros

"Galicia rexistra unha das concentracións máis significativas de minerais críticos de todo o continente europeo", asegurou este luns o presidente da Xunta, Alfonso Rueda, atendendo a un informe elaborado pola USC, por encargo da administración autonómica, para avaliar a potencialidade mineira do país. 

Segundo ese estudo, o valor mineiro de Galicia pode chegar aos 45.000 millóns de euros (entre 25.000 e 45.000 millóns), o que segundo Rueda supón "unha oportunidade que non podemos perder".

Segundo o informe da USC, hai presenza en Galicia de 18 das 34 materias primas "críticas" identificadas pola UE para sectores industriais clave, que se encontran en cinco corredores principais: Santiago-Touro-Lalín, rico en cobre, cobalto, zinc, galio, xermanio e indio; cabo Ortegal-Moeche, con elementos como o cromo, e do grupo do platino; Penouta-Forcarei, con tantalio, niobio, litio e estaño, sendo o único con produción activa de tantalio en Europa; san Fins-Santa Comba, con volframio, estaño e bismuto; e Vigo-Tui-O Porriño, corredor das terras raras.

"Somos unha rexión de excepcional potencial xeolóxico", asegura a conselleira de Industria, María Jesús Lorenzana, quen destacou que xa "estamos a producir un 9,5 % da actividade mineira de todo o Estado".

Lorenzana destacou, que segundo a clasificación realizada no estudo da USC, hai "unha posición de liderado do tantalio e niobio, que dá vantaxe competitiva a Galicia como único produtor europeo, as terras raras e o litio supoñen a maior oportunidade de crecemento futuro, e o volframio, así como o sistema de cobre e cobalto, proporcionan bases moi sólidas para o desenvolvemento de capacidades industriais complementarias".

"É fundamental para que saia adiante a estratexia que a cidadanía entenda o que se está levando a cabo", di Lorenzana. "A riqueza ten que redundar no territorio", cre a conselleira.