A ministra de Sanidade Carolina Darias anunciou a aprobación do novo semáforo sobre a transmisión da covid–19 e a ocupación hospitalaria, que establece os novos limiares de risco, aínda que o seu departamento e as comunidades autónomas non deron o visto e prace ás medidas e restricións asociadas a cada nivel.

O novo semáforo está estipulado no documento Actuacións de resposta coordinada para o control de COVID–19, que esta tarde tratou o Consello Interterritorial do Sistema Nacional de Saúde.

Desta maneira, o risco baixo situarase entre os 50 e 100 casos (agora entre 25 e 50), o risco medio estará entre os 100 e os 300 casos (agora entre os 50 e os 150), o alto de 300 a 500 (agora entre 150 e 250) e o moi alto ou extremo a partir de 500 (agora a partir dos 250 casos).

Ademais, a Comisión aprobou a terceira dose para os maiores de 60 a 69 anos, que se suman así aos maiores de 70, que xa a estaban recibindo, e ao persoal sanitario e sociosanitario.

A Xunta abstense ante a decisión do cambio no semáforo

No relativo ao semáforo, a Directora Xeral de Saúde Pública Carmen Durán Parrondo explicou a abstención de Galicia e defendeu o pasaporte covid, uso da máscara, hixiene e a ventilación como as ferramentas axeitadas para esta nova etapa da pandemia.

A Consellería de Sanidade comezará a citar os cidadáns de 60 a 69 anos unha vez estea rematado o rango de 70 a 79 anos. Son 395.000 persoas, que recibirán a terceira dose da vacina contra a covid–19 nalgún dos 16 puntos de vacinación masiva da comunidade autónoma.

A Comisión Nacional de Saúde Pública acordou vacinar tamén os traballadores sanitarios e sociosanitarios, unha medida que tamén apoia a Xunta aínda que reitera a necesidade dunha planificación axeitada para unha maior eficacia do proceso de vacinación.