Comezan en Irán os funerais públicos polo asasinado líder supremo Alí Khamenei
O dirixente faleceu hai máis de catro meses nos ataques dos Estados Unidos e Israel no primeiro día da guerra
Milleiros de persoas na Gran Mesquita, en Teherán. REUTERS/Mohammed Salem
Irán comezou este sábado os funerais públicos polo líder supremo, Alí Khamenei, asasinado nos ataques lanzados polos Estados Unidos e Israel no primeiro día da guerra, o 28 de febreiro.
Milleiros de persoas achegáronse á Gran Mesquita, en Teherán, para darlle o último adeus ao home que dirixiu a República Islámica durante máis de 36 anos.
O seu cadaleito, xunto ao da filla, neta, xenro e nora, falecidos na mesma data, presiden a cerimonia desde o alto do escenario. Aquí vai permanecer ata as 20:00 horas.
Entre a multitude, hai moitos retratos, bágoas, golpes no peito e peticións de vinganza. Tamén destaca unha bandeira vermella coa frase en inglés "Kill Trump", en alusión ao presidente dos Estados Unidos.
Os cadaleitos de Khamenei e a súa familia. REUTERS/Alkis Konstantinidis
Seis días de funerais
As autoridades iranianas agardan a participación duns 20 millóns de persoas nos actos de despedida que van continuar o luns, co percorrido pola capital do cortexo fúnebre.
O martes trasladarase á cidade santa de Qom e o mércores a Iraq. Finalmente, Khamenei vai ser soterrado o xoves na cidade sacra de Mashad, no nordés do país, no mausoleo do imán Reza, o oitavo do chiísmo.
Este venres celebrouse unha cerimonia de homenaxe coa participación de altos cargos iranianos e estranxeiros, entre eles os primeiros ministros de Paquistán e Armenia e os presidentes de Iraq, Tadxiquistán e Xeorxia.
Tamén estiveron representantes de Rusia, da China, Siria, O Líbano, Afganistán, Marrocos, Qatar, Omán, Arabia Saudita, Nicaragua e Cuba, entre outros.
