A ONU acusa os EUA de crimes de guerra en Irán, e a Teherán, de crimes de lesa humanidade

A Misión de Investigación da ONU para Irán asegura que existen "motivos razoables" para crer que os Estados Unidos cometeron crimes de guerra en dous ataques que dirixiu no inicio da guerra contra territorio iraniano, país ao que tamén acusou de posibles crimes, no seu caso de lesa humanidade, pola súa violenta represión das protestas previas ao conflito.

Nun informe que presentará ante o Consello de Dereitos Humanos de Nacións Unidas, publicado este xoves, a misión de tres expertos ve supostos crimes de guerra por parte dos Estados Unidos nos bombardeos que o 28 de febreiro, primeiro día de hostilidades, dirixiu contra unha escola de Minab e unha zona residencial de Lamerd, ambas no sur de Irán.

No ataque de Minab, que causou a morte de máis de 150 persoas, entre elas uns 120 menores, os Estados Unidos "cometeron un crime de guerra ao lanzar un ataque indiscriminado con morte e lesións a civís.

As forzas norteamericanas actuaron "deliberadamente" e "sendo conscientes de que existía un risco considerable de alcanzar un interese de carácter civil, actuando con imprudencia temeraria", agregou a misión.

En similares termos referiuse o grupo de expertos respecto ao ataque a unha zona poboada de Lamerd, que alcanzou un centro deportivo, unha escola primaria adxacente e edificios residenciais, causando polo menos 22 mortos.

Represión do réxime

Respecto a Irán, a misión conclúe que moitas das graves violacións de dereitos humanos cometidas polo réxime constitúen os crimes de lesa humanidade de asasinato, encarceramento, tortura e outros actos inhumanos dirixidos contra unha poboación civil.

Nas protestas de finais de 2025 e principios de 2026, as forzas de seguridade iranianas "utilizaron forza letal para matar e ferir a manifestantes e transeúntes, incluídos nenos", destacou o informe de 18 páxinas.

A misión non dá unha cifra completa de vítimas da represión durante as protestas, pero si indica que morreron polo menos 221 nenos.

Agrega que as forzas de seguridade utilizaron armas e munición fóra dos parámetros establecidos para o seu uso, causando a morte ou feridas a manifestantes, e dentro dos hospitais "someteron a pacientes, persoal médico e familiares a un uso innecesario da forza, detencións arbitrarias e fustrigación".

Ademais, as autoridades obstaculizaron que os manifestantes puidesen acceder a atención sanitaria esencial, incluso impedindo o acceso a tratamentos urxentes.

Segundo as autoridades iranianas, en dous días de represión, o 8 e 9 de xaneiro, o número de mortos foi de 3.117, pero organizacións de dereitos humanos como a opositora HRANA, con sede nos Estados Unidos, elevan esa cifra a máis de 7.000.

Tras esa represión intensificouse o uso da pena de morte contra manifestantes, e entre marzo e agosto polo menos 29 homes foron executados pola súa participación nas manifestacións tras xuízos acelerados, sinalou a misión, alertando que outras 70 persoas están en risco de ser executadas.

Os civís iranianos, grandes vítimas

Á luz destes abusos, o informe conclúe que a poboación civil de Irán "atópase atrapada entre as graves violacións dos dereitos humanos e os crimes de lesa humanidade cometidos polo seu propio Goberno e o mortífero conflito do país cos Estados Unidos e Israel".

Pide por iso aos gobernos iraniano e estadounidense que poñan fin ás violacións de dereitos humanos, proporcionen garantías de non repetición e reparación ás vítimas e ao Estado prexudicado.