Comeza o Galicia Fest en Vigo, este venres co prato forte de La Reina del Flow

No peirao de transatlánticos en Vigo xa está todo listo porque arrinca a segunda edición do Galicia Fest, un dos grandes eventos musicais do verán cun cartel de luxo. Os abonos están esgotados, pero, se están interesados, aínda quedan entradas diarias.

O Galicia Fest quere ser a banda sonora do inicio do verán neste escenario de luxo, coa ría a un lado e a cidade ao outro, e sobre todo boa música. Marylan serán os primeiros en poñer música a esta cita coa cultura na que tamén actuarán este venres Sabela, Coti, La Reina del Flow e José Rico.

A xornada do sábado combina música electrónica con indie e pop. Lory Meyers, Vera Fauna, Taburete, Álvaro de Luna, Carla Lourdes, Fredi Leis compoñen un cartel que pechará a última hora Juan Magán.

Moita expectación nas horas previas cun público entregado, formado por adolescentes na súa gran maioría, e que a primeira hora non dubidaron en agardar na entrada para coller os mellores postos para non perder detalle da actuación da estrela central do cartel. E é que a versión musical dunha telenovela colombiana emitida por Netflix causa furor entre a rapazada. 

Por diante varios días de música e festa que colocan a Vigo no epicentro dos festivais en Galicia nesta última semana de xuño.