Codenan os xestores de Alu Ibérica a pagar 19,6 millóns por levala á creba
Esta é a primeira sentenza contra os xestores da venda das antigas factorías de Alcoa na Coruña e Aviles, á espera do proceso penal aberto na Audiencia Nacional
O Xulgado do Mercantil número 1 de Oviedo declarou como culpable o concurso de Alu Ibérica, que implicou o peche das antigas instalacións de Alcoa en Avilés e A Coruña, que sumaban case 600 traballadores, e condenou os seus administradores ao pago dun total de 19,6 millóns de euros.
O ditame, que representa a primeira sentenza pola xestión da empresa alumineira á espera do proceso penal aberto na Audiencia Nacional, condena a Luis Losada Gómez e Joachim Magin, como administradores de dereito, e a Víctor Rubén Doménech e Alexandra Camacho, como administradores de feito, os tres últimos en situación de rebeldía procesual.
A sentenza impón o pagamento de 6,1 millóns de euros "pola saída fraudulenta de bens" da empresa concursada e doutros 13,5 millóns "en concepto de danos e perdas", é dicir, un total de 19,6 millóns de euros.
O Xulgado do Mercantil tamén condena como cómplice á mercantil Blue Motion Technologies, tamén en rebeldía procesual, polo que deberá participar no pagamento de forma conxunta e solidaria xunto co resto de afectados pola cualificación de culpabilidade do concurso.
Alcoa acordou en xullo de 2019 a venda das súas instalacións en Avilés e A Coruña á sociedade Blue Motion Technologies, integrada á súa vez no grupo suízo Parter Capital.
Posteriormente, a antiga Alcoa, xa coa denominación de Alu Ibérica, foi vendida en abril de 2020 ao vehículo de investimento System Capital Mangement (actual Iberian Green Aluminium Company), integrada no Grupo Industrial Risco.
Audiencia Nacional
A Audiencia Nacional propuxo en xaneiro do pasado ano xulgar oito persoas, entre elas as catro condenadas polo Xulgado do Mercantil de Oviedo, polas presuntas irregularidades no proceso de venda das plantas co fin de descapitalizalas e desviar os seus activos cara ao seu patrimonio persoal e estruturas societarias creadas para iso.
A xuíza entende que os feitos son constitutivos de delitos de apropiación indebida ou administración desleal, insolvencia punible, branqueo de capitais e constitución ou pertenza a organización ou grupo criminal.
A causa iniciouse por unha querela presentada pola Confederación de Cadros Profesionais ante o proceso de venda das plantas de produción de aluminio de Alcoa Inespal tendo en conta a situación económica que atravesaban.
