A China anuncia consenso para retomar a tregua comercial cos EUA logo da reunión en Londres

A China e os Estados Unidos concluíron as súas dúas xornadas de negociacións comerciais en Londres cun acordo preliminar para establecer un marco de traballo que execute o consenso alcanzado polos presidentes de ambos os países, Xi Jinping e Donald Trump, na chamada que mantiveron a semana pasada.

Li Chenggang, un dos negociadores do equipo chinés, asegurou tras o encontro que as dúas partes mantiveron intercambios profesionais, racionais, profundos e sinceros nestes dous últimos días, recolle a axencia estatal chinesa Xinhua.

Segundo Li: "Ambas as partes acordaron en principio un marco para executar o consenso" alcanzado por Xi e Trump e tamén ao que chegaron nas negociacións de Xenebra do mes pasado.

"Ambas as partes presentarán un informe aos seus respectivos líderes sobre as conversacións mantidas na reunión e sobre o marco alcanzado en Xenebra. Esperamos que os avances logrados nesta reunión de Londres contribúan a unha maior confianza entre A China e Os Estados Unidos", dixo Li, viceministro de Comercio e representante de comercio internacional do país asiático.

Pola súa banda, o secretario estadounidense de Comercio, Howard Lutnick, asegurou que o marco comercial e o plan de execución deberían dar como resultado a resolución das restricións sobre terras raras e que o seu equipo presentará o consenso alcanzado a Trump para obter a súa aprobación, recolle a prensa local.

"Eles volverán falar con Xi e aseguraranse de que o aprobe. Se se aproba, executaremos o marco no que traballamos arduamente estes dous últimos días”, afirmou.

Lutnick encabeza xunto ao secretario do Tesouro, Scott Bessent, e o representante comercial dos EUA, Jamieson Greer, a delegación do seu país, mentres que o viceprimeiro ministro chinés, Hei Lifeng, home de confianza do presidente Xi Jinping, fai o mesmo coa do seu país.

As conversacións buscaron rebaixar as tensións entre ambas as potencias despois de acusárense mutuamente de incumprir o acordo alcanzado en Xenebra o mes pasado.

A China acusou os EUA de incumpríreno polas súas guías de control á exportación de chips de intelixencia artificial, a suspensión de vendas de software de deseño de semicondutores e a revogación de visados para estudantes chineses.

Pola súa banda, Washington acusou a Pequín de incumprir a tregua polas restricións que impuxo á exportación de terras raras, vitais para os fabricantes de automóbiles e outras industrias.

A pesar diso, a chamada telefónica que mantiveron Xi e Trump facilitou a convocatoria desta reunión.

En Xenebra, ambas as potencias alcanzaron un pacto temporal de 90 días, polo cal A China reduciría do 125 % ao 10 % os aranceis sobre produtos estadounidenses mentres que os EUA farían o propio do 145 % ao 30 % para os bens chineses.