Chega a Madrid o segundo grupo de integrantes da flotilla a Gaza expulsados por Israel
Dos 49 españois que ían na flotilla, 21 volveron o domingo e outros 27 chegaron este luns en voos a Madrid, Bilbao e Barcelona
Só queda en Israel unha activista acusada de morder un funcionario durante o recoñecemento médico
Catro activistas da Flotilla que chegaron este luns a Bilbao. EFE/Luis Tejido
Os integrantes da flotilla a Gaza expulsados por Israel aterraron arredor das 23.10 horas deste luns no aeroporto de Baraxas, en Madrid, a bordo dun avión militar do Exército do Aire fretado polo Goberno español.
En total, viaxaban 27 persoas, segundo fontes do Ministerio de Asuntos Exteriores.
A aeronave trasladou aqueles que “voluntariamente” quixeron aproveitar esta opción, así como outras persoas doutros países da Unión Europea.
Dos 49 cidadáns españois que viaxaban na flotilla interceptada por Israel a semana pasada, 21 regresaron o domingo e outros 27 fixérono esta noite desde Atenas en distintos grupos, con voos directos a Madrid, Bilbao e Barcelona.
Fontes diplomáticas israelís confirmaron previamente que todos os cidadáns españois que permanecían detidos abandonaran xa Israel, agás unha integrante que deberá comparecer o mércores ante a Policía acusada de morder o domingo un funcionario da prisión durante un recoñecemento médico.
