Centos de persoas piden en Langreo "non mirar para outro lado" na violencia machista
Condenaron o asasinato da súa veciña Karilena a mans da súa parella
A vítima tiña 40 anos e tres fillos menores dunha relación anterior
Centos de persoas concentráronse este sábado no concello de Langreo para condenar o primeiro asasinato machista deste 2025 e pedirlles aos representantes políticos e á sociedade que non miren para outro lado.
A muller asasinada pola súa parella chamábase Karilena, tiña 40 anos e tres fillos menores dunha relación anterior. O seu agresor, de 72, está detido e o luns pasará a disposición xudicial.
Os asistentes á concentración de condena deste crime machista celebrada na praza do concello de Langreo gardaron cinco minutos de silencio.
No acto participaron representantes políticos, incluído o presidente do Principado de Asturias, e tamén de colectivos feministas.
"Todas as persoas que estamos aquí temos a responsabilidade de traballar para que iso acabe, de intervir cando hai situacións de violencia como fixeron onte as dúas mozas que intentaron socorrer a vítima".
O asasinato tivo lugar en plena rúa ás once da noite do venres e diante de dúas testemuñas, dúas mulleres que estaban sentadas nun banco e intentaron auxiliar a vítima, mentres o seu agresor a acoitelaba.
"O mundo é mellor cando hai persoas que non miran para outro lado".
"Fronte aos asasinatos feminicidas temos que levantar a man e dicirlles que non van seguir adiante", dixo Roberto García, alcalde de Langreo.
"Eu non podo deixar de lamentar que a estas alturas haxa xente negacionista, que negue que existe algo que se chama terrorismo machista que mata tantas mulleres e deixa tantos orfos e que aínda hoxe hai silencios cómplices", asegurou Adrián Barbón, presidente do Principado.
No momento do crime, os tres fillos menores de Karilena estaban co seu pai. A delegada do goberno, Adriana Lastra, explicou que vítima e asasino mantiñan unha relación desde hai pouco tempo.
"Non había denuncias previas por malos tratos entre eles".
O 016 atende a todas as vítimas de violencia machista as 24 horas de todos os días e en 53 idiomas diferentes.
