Catro detidos por roubar en casas de Ourense, Pontevedra, Valladolid e Madrid

Os Mossos d'Esquadra, en colaboración coa Garda Civil, desartellaron un grupo especializado no roubo con forza en vivendas tras deter os seus catro integrantes.

Atribúenlles a entrada en cinco casas de Ourense, Pontevedra, Valladolid e Madrid e investigan a súa relación cunha ducia de furtos máis. Os arrestos, segundo informa a policía catalá, practicáronse o día 28.

Son catro homes, de entre 35 e 46 anos, que residían en Barcelona e desprazábanse a outras cidades para roubar desde decembro de 2024. O botín conseguido ocultábano nunha zona boscosa do barrio de Bellvitge, no municipio de L'Hospitalet de Llobregat.

A investigación conxunta dos Mossos e da Garda Civil comezou no mes de marzo, cando se identificou parte dos membros do grupo. Os detidos utilizaban un modus operandi moi calculado e sempre con accións fóra de Cataluña.

Ocultos en bosques

Marchaban entre tres e cinco días antes de cometer o roubo, tempo no que se ocultaban e durmían en bosques próximos ás vivendas baleiras nas que tiñan previsto entrar. Entraban usando a forza e escalando.

Ao lugar do roubo chegaban en coches con matrículas dobradas, para dificultar a súa localización. Unha vez cometido o golpe, volvían ocultarse no bosque ata que os axentes acababan o seu operativo na casa na que roubaran.

Agocho en Bellvitge

Cando regresaban a Barcelona, gardaban os obxectos roubados nun agocho situado nunha zona boscosa do barrio de Bellvitge para non deixar evidencias nos seus domicilios e distribuír máis facilmente o subtraído.

En dúas entradas practicadas pola Policía na cidade de Barcelona, os axentes interviñeron 5.000 euros en metálico, xoias e reloxos. No agocho de Bellvitge recuperaron algúns obxectos roubados.

O líder do grupo, explican os Mossos, tiña antecedentes penais por delitos contra o patrimonio.