Castro prefire non facer contas: “Era bo en matemáticas, pero vidente, non”

O adestrador do Levante, Luís Castro, asegurou este luns que ve os seus xogadores convencidos da permanencia, pero negouse a facer contas sobre os puntos que serán necesarios para salvarse, aínda que deixou claro que na súa opinión non serán suficientes os que en anos anteriores valeron para seguir en Primeira.

“Sinto que os afeccionados cren en nós, pero cen por cento certo que os xogadores van crer ata o último segundo. Cando era neno era moi bo en matemáticas, pero vidente, non. Penso que os puntos que foron suficientes en moitos dos outros anos este ano non vai ser suficiente. Penso eu, poida que si, imos ver”, dixo Castro na conferencia de prensa previa ao partido.

“Hai uns meses asinariamos os puntos que temos agora. Estabamos con dez puntos cando cheguei e agora con 36. Estamos mellor. Tamén é verdade que a Liga é de tolos, todos os equipos están a facer máis puntos do normal. O traballo é simple, intentar gañar o próximo partido”, engadiu o adestrador luso.

Sobre o Celta de Vigo, o adestrador do Levante destacou que na súa opinión estaría mellor clasificado se non fose polo desgaste que tivo na competición europea e mostrouse convencido de que o Levante está preparado para sumar a súa segunda vitoria fóra de casa do ano.

“É un equipo moi bo, pero imos intentalo. É moi forte, un dos mellores da Liga. Ten boas solucións no persoal, por iso cambian un pouco máis. Cando estaba a xogar en Europa perderon algúns puntos, xa están arriba e se non chegan a perder eses puntos ían estar máis arriba. Temos que estar ao cen por cento concentrados e ao máximo”, indicou.