Carlos Carvalhal di que, malia as vitorias, o Celta ten "os pés na terra"
Carvalhal dixo que non coñece a Clemente Montes, un nome que se vinculou ao Celta nas últimas horas
Carlos Carvalhal admitiu na previa de recibir ao Vilarreal en Balaídos tras gañar ao Elxe que "as vitorias dan confianza", pero que teñen "os pés na terra".
Para o adestrador do Celta, o punto de inflexión do equipo foi fronte ao Sevilla, aínda que non lograsen gañar ese partido e a nivel de resultados, poida selo o duelo do Martínez Valero. Agora espéralles "un equipo forte" ante o que promete pelexar polos tres puntos contando con que recibirán "un gran apoio por parte da afección".
Carvalhal dixo non coñecer a Clemente Montes, un nome que se vinculou ao Celta nas últimas horas. Reiterou a súa confianza no plantel pero tamén que lle gustaría algún reforzo, como xa vén dicindo:
"A confianza no persoal que temos é total. Están detectadas as posibilidades de mellorar un pouco e iso transmitinllo a Luís (Campos), a Antonio (Chaves) e ao presidente".
