Calma tensa en Torre Pacheco, con 130 axentes mobilizados e 14 detidos

Noite sen incidentes en Torre Pacheco, onde máis de 130 axentes das unidades antidisturbios seguen mobilizados para previr altercados coma os de días pasados.

Pese á convocatoria dunha manifestación de grupos ultra, que congregou pouco máis dun centenar de persoas na localidade murciana, as forzas de seguridade evitaron que se produciran novos disturbios.

En total xa hai 14 detidos, 11 polos altercados e 3 a raíz da malleira sufrida por un veciño de 68 anos do municipio. Entre os detidos, un mozo de 19 anos, que sería o terceiro implicado nesa agresión.

Segundo relatou a diversos medios, foi atacado por uns mozos, presuntamente de orixe magrebí, e relatou que todo sucedeu "nun minuto" e sen previo aviso.

López Miras pide calma

O presidente de Murcia, Fernando López Miras, pediu este mércores "calma" e "que cese xa a violencia" en Torre Pacheco, e apuntou que calquera discurso que non reclame iso "non é responsable".

"Calquera mensaxe dirixida a Torre Pacheco que non sexa pedir calma e pedir que cese a violencia, non é responsable", sinalou López Miras, quen explicou que a súa "obrigación" é a de "procurar que se manteña a convivencia e que se manteña a tranquilidade coa que souberon vivir e coa que saben vivir os cidadáns de Torre Pacheco".

En declaracións aos medios de comunicación e ao ser preguntado por este asunto, López Miras insistiu en que "o único responsable que se pode facer agora mesmo para Torre Pacheco é pedir que cese xa a violencia e calma".

Por unha banda, López Miras apostou por lanzar mensaxes "só dirixidas a que pare a violencia" e, doutra banda, considerou que as Forzas e Corpos de Seguridade do Estado, o Ministerio do Interior e o Goberno de España, que é o que ten a competencia exclusiva, "ten que impedir xa que haxa calquera tipo de persoa que veña de fóra de Torre Pacheco sementar a discordia e traer violencia, que é o que estamos a ver durante estes días".