Cae o muro de pedra que sostén unha urbanización en Barbadás
En menos de 10 segundos esborrallou o muro da urbanización 'A Moura'
De momento descoñécese o motivo do esborrallamento da parede de perpiaño. Algúns veciños apuntan a fallos de construción, outros ás intensas choivas e os fortes refachos de vento
Impactante foi para os veciños dunha urbanización do concello ourensán de Barbadás ver como caía o muro de pedra que facía de contención. O muro caeu sobre unha beiravía. Por fortuna nese momento non pasaba ninguén.
De momento descoñécese o motivo polo que se veu abaixo a parede de perpiaño pero todo parece indicar que as intensas choivas e os fortes refachos de vento rexistrados estes días poderían estar detrás do esborrallamento, segundo explica Daniel Rey, responsable de Emerxencias de Barbadás
En menos de 10 segundos esborrallou o muro da urbanización A Moura. Pouco antes o veciño dunha casa lindeira avisaba á Policía local de que os cachotes parecían que se ían desprender, o muro parecía que comezaba a facer unha barriga.
Din que a veciñanza apunta a algún fallo na súa construción, pero o paso do tempo e precisamente a chuvia acumulada estes días parecen as causas máis probables deste derrubamento. Agora vén o tempo da investigación para saber o sucedido.
A rápida intervención da Policía Local e da Protección Civil de Barbadás evitaron danos maiores. Pouco despois as máquinas da empresa construtora traballaban na retirada dos cachotes.
