A dificultade de atopar traballo despois dos 45 anos
Coa Feira de Emprego Sénior, que se celebra en Palexco, a Cámara de Comercio da Coruña busca fomentar a empregabilidade nesta franxa de idade
En Galicia, o 62 % dos parados teñen máis de 45 anos. Ten que ver co envellecemento da poboación, que fai que proporcionalmente haxa máis desempregados nese grupo de idade, pero tamén con que a esas alturas da vida resulta un pouco máis difícil acceder a un posto de traballo. Dese 62 %, un 60 % son mulleres. Entre os desempregados de máis de 45 hai tamén máis parados de longa duración e máis traballos curtos.
"Hai tamén unha porcentaxe elevada de inmigrantes, algúns cunha cualificación elevada, e o que tentamos con este tipo de eventos é facer cadrar a oferta e a demanda", di Manuel Galdo, director xeral da Cámara de Comercio da Coruña
Hoxe están presentes nesta Feira Sénior máis de 60 empresas para as que contratar maiores de 45 non é problema.
