Bruxelas inclúe o café soluble na lei contra a deforestación e retira o coiro

A Comisión Europea excluíu produtos como o coiro, os pneumáticos recauchutados ou a soia para sementar da lista de produtos afectados pola lei europea contra a deforestación, á vez que engadiu outros como o café soluble ou algúns derivados do aceite de soia.

En concreto, Bruxelas adoptou unha normativa que actualiza e simplifica a lista de produtos cubertos por esta lei, así como medidas sobre a presentación de declaracións por parte das empresas afectadas pola mesma, que buscan "proporcionar maior seguridade xurídica" para a súa futura aplicación.

Algunha das medidas xa foron avanzadas no paquete de simplificación lexislativa que o Executivo comunitario presentou a principios de maio. Antes de entrar en vigor, os cambios serán consultados co Parlamento Europeo e os Estados membro e entrarán en vigor se ninguén se opon.

Así, exclúense do ámbito de aplicación do regulamento o coiro, as peles de bovino, os pneumáticos recauchutados, a soia para sementar, os artigos de caucho vulcanizado, as correas transportadoras e de transmisión e os asentos para aeronaves e vehículos de motor.

Por contra, engádense a esa mesma lista de produtos o café soluble, determinados derivados do aceite de palma e as linguas de bovino conxeladas. Bruxelas aclarou, no entanto, que esta actualización "non altera a lista de materias primas" cubertas pola lei, senón que se actualiza a lista de artigos derivados destas.

“Con este paquete, proporcionamos a claridade e a previsibilidade que as empresas, os Estados membro e os nosos socios internacionais necesitan para prepararse para a aplicación do regulamento da UE sobre a deforestación a finais de 2026", subliñou a comisaria de Medio Ambiente, Jessika Rosswal.

O regulamento contra a deforestación importada busca impedir que o consumo europeo, responsable dun 10% da deforestación mundial, siga contribuíndo á destrución de bosques en terceiros países e tamén dentro da UE pois a normativa é idéntica dentro do mercado comunitario.

Para iso, obriga ás empresas que introducen no mercado comunitario cacao, café, soia, aceite de palma, madeira, caucho ou gando a demostrar, mediante sistemas de rastrexabilidade e xeolocalización, que non proceden de terreos deforestados ou degradados.

Desde a súa aprobación, con todo, o regulamento foi obxecto de críticas por parte de empresas e de países produtores -como o Brasil, Paraguai, os Estados Unidos, Malaisia ou Indonesia- que alertaban da súa complexidade e dos custos de cumprimento e, no ámbito político, foi criticada polas formacións de ultradereita e de centrodereita.

Todo iso levou a Bruxelas a introducir xa unha serie de flexibilidades, como o aprazamento da súa entrada en aplicación ata decembro de 2026 para grandes empresas e xuño de 2027 para pequenas, así como a simplificación das obrigacións para micro e pequenos operadores primarios.