Bruxelas abre unha investigación aos servizos na nube de Amazon e Microsoft

A Comisión Europea abriu este martes unha investigación a Amazon e Microsoft para pescudar se os seus servizos de computación na nube teñen suficiente poder de mercado como para obrigarlles aos requisitos máis estritos da lei de mercado dixitais (DMA), que regula a libre competencia no sector dixital.

Nin Amazon Web Services nin Microsoft Azure teñen polo menos 45 millóns de usuarios mensuais na Unión Europea, polo que, formalmente, non cumpren os requisitos para designalos como "gardiáns de Internet", pero o Executivo comunitario quere saber se, aínda así, teñen suficiente cota de mercado para minar a libre competencia.

"As análises dos mercados da nube realizados nos últimos anos parecen indicar que os servizos de computación na nube de Microsoft Azure e Amazon Web Services ocupan posicións moi sólidas en relación coas empresas e os consumidores", indicou Bruxelas nun comunicado.

O Executivo comunitario quere terminar a investigación nun máximo de 12 meses e, se chegase á conclusión de que os servizos na nube de Amazon e Microsoft teñen suficiente poder de mercado, designaríanos como grandes plataformas de Internet; como xa o son Amazon Marketplace, Amazon Ads, o sistema operativo Windows para computadores e tabletas e a rede social Linkedin.

En paralelo, Bruxelas tamén está a analizar se a DMA é unha lexislación adecuada para regular os posibles riscos que os servizos de computación na nube poidan causar á libre competencia.

Esta investigación concluirá coa publicación dun informe nun prazo de 18 meses, en que a Comisión poderá propoñer unha actualización das obrigacións da MDA con respecto aos servizos de computación na nube.