Bota a andar a nova variante de Viveiro, que sacará o tráfico do núcleo urbano
Alfonso Rueda presentou o proxecto e explicou que a infraestrutura mellorará a seguridade viaria e as comunicacións dos veciños da Mariña lucense
Está pensada para articular o tráfico dun concello que soporta máis de 13.000 vehículos ao día
As obras da nova vía comezarán esta lexislatura
A nova variante de Viveiro está pensada para articular o tráfico dun concello que soporta máis de 13.000 vehículos ao día. O novo trazado permitirá liberar o núcleo urbano.
"O tráfico aquí é moi complicado, por iso en poucos sitios de Galicia é tan evidente a necesidade dunha variante como en Viveiro e eu celebro que vaia ser unha realidade", asegura o presidente da Xunta, Alfonso Rueda.
Prevese que o 60 % dos vehículos empreguen a nova infraestrutura, que absorbería todos os desprazamentos de longo percorrido, a circulación cara ao porto de Celeiro e parte do tránsito local.
A vía completa consta de algo máis de 10 quilómetros. A variante leste, que se presentou este martes e cuxas obras comezarán esta lexislatura cun investimento de case 40 millóns de euros, e a variante Oeste, que conectará co Vicedo.
A variante leste discorrerá desde a glorieta de conexión na LU-540 ata o inicio do corredor Celeiro-San Cibrao. Na súa configuración técnica destacan dúas grandes estruturas: un viaduto de 503 metros en Celeiro e un viaduto de 130 metros en Rego Fontecoba.
Por outra banda, o Goberno galego inviste tamén 8,2 millóns de euros na transformación do tramo Viveiro-Ourol (LU-540), unhas obras que finalizarán en 2026.
.png)
