Borja Iglesias: "Hai meses non o pensaba, pero agora soño con ir ao Mundial"

Borja Iglesias, dianteiro da selección española, recoñeceu que pese que hai uns meses non o pensaba, na actualidade e tras a chamada de Luis de la Fuente, "soña" con ser un dos integrantes do equipo que vaia ao Mundial 2026. Así o admitiu este mércores o futbolista do Celta durante un acto de patrocinio celebrado na Cidade do Fútbol de Las Rozas.

"Moi contento co que estou a vivir, xa non só no fútbol tamén no persoal. Hai uns meses non o pensaba pero agora igual si que é algo co que soño", afirmou.

O galego dixo que están na selección para "aprender, sumar e crecer", pero tamén que esta é a última convocatoria antes da cita internacional, polo que os compañeiros falan nos vestiarios sobre as posibilidades de acudir con España. Sobre o seu rol, ao ser comparado cun 9 grande como o exinternacional Fernando Llorente, afirmou sentirse cómodo e afagado polas similitudes co dianteiro rioxano.

"Na selección estou cómodo. Fernando é un dos referentes máis importantes para calquera español. Que me comparen con el é unha honra", sinalou.

Sobre se se vía marcando un gol como o de Andrés Iniesta na final do Mundial de 2010 en Suráfrica, quixo restar importancia e subliñar que el estaría para "axudar":

"Soño con estar aí e que o marque calquera. Se podo sumar, fareino desde onde me toque".